Branko Cërvenkovski: Vendi po perballet me nje krize politike serioze ne nje moment te papershtatshem

Branko Cërvenkovski duke folur me gazetaret

Në Maqedoni prej dje kemi krizë serioze politike dhe atë në momentin më të pavolitshëm për vendin tonë. Ndodhemi vetëm 20 ditë para Samitit të NATO-s në Bukuresht, kur presim ta marrin ftesën dhe në fazën me delikate të negociatave rreth emrit me Republikën e Greqisë. Kjo situatë është e palejueshme dhe duhet urgjentisht të tejkalohet, deklaroi presidenti Branko Cërvenkovski, pas ligjëratës së sotme në Fakultetin Juridik, me temë "Aspiratat evropiane dhe euroatlantike të Republikës së Maqedonisë".

Duke u përgjigjur në pyetjen e gazetarëve, ai tha se idetë e promovuara në opinion për zgjedhje të parakohshme apo formim të koalicionit të gjërë nuk e zgjidhin problemin. "Përkundrazi, mendoj se vetëm do ta komplikojnë dhe se janë ide kontraproduktive. Dëshiroj ta shfrytëzoj këtë rast të dërgoj porosi, apel tek të gjithë liderët e partive politike kyçe të sillen me përgjegjësi, por edhe të evitojnë t'i hapin këto tema në opinion në këtë periudhë", theksoi Cërvenkovski.

Ai përkujtoi se këto 20 ditë, siç tha, na presin vendime të vështira dhe përgjegjëse, në mënyrë që të përballemi me to dhe t'i zgjedhim solucionet e mundshme më të mira.

"Neve na nevojitet stabilitet elementar politik, sa më shumë të jetë e mundur konsensus politik dhe institucione me kredibilitet. Për të ndihmuar në atë plan, menjëherë pas kthimit të kryeministrit Nikolla Gruevski nga Brukseli, sipas të gjitha gjasave, nesër, do ta thërras për bisedë me qëllim që t'i dëgjoj mendimet dhe qëllimet e tij, ndërsa më pas, gjatë dy apo tre ditëve të ardhshme, jo më vonë se të hënën, në varshmëri prej asaj se ku ndodhen kryetarët e partive politike, do të organizoja edhe takim të liderëve, me qëllim që të gjendet mënyrë për t'u tejkaluar kjo situatë", tha Cërvenkovski.

"Presidenti i Maqedonisë shtoi se ka disa ide, por se është shumë herët për t'i kumtuar, duke shfaqur më pas shpresë se edhe vetë ata në takime do të vijnë me disa pikëpamje të veta apo propozime për zgjidhjen e kësaj situate.

"Në çdo rast, mendoj se është obligim i yni, detyrë, të japim gjithçka prej vetes që këtë situatë ta tejkalojmë shpejtë dhe të fokusohemi në çështjen kyçe, e ajo është Samiti i NATO-s dhe si ta fitojmë ftesën", theksoi Cërvenkovski.

Në pyetjen lidhur me formalizimin e vendimit të kryesisë së PDSH-së për dalje nga Qeveria, çka do të thoshte qeveri pa shtatë-tetë ministra, presidenti Cërvenkovski me qëndrim se është e palejueshme për Maqedoninë në një periudhë të këtillë kyçe, historike, 20 ditë para Samitit të NATO-s, të sillet në situatë të përballet me faktin se nuk ka qeveri apo të ketë qeveri pa kredibilitet për të zgjedhë një çështje të tillë.

"Duhet të gjejmë solucion për ta tejkaluar këtë. Jam i gatshëm nga ana ime të bëj gjithçka, të ndihmoj sa të jetë e mundur që ky problem të zgjidhet, kuptohet, nëse ajo do të arrihet varet nga vullneti, dëshira dhe ndjenja e përgjegjësisë dhe serioziteti i të tjerëve", tha presidenti Branko Cërvenkovski