24 ore lajme: Kryeministri i sapozgjedhur malazez nuk pranon të thotë nëse qeveria e tij do ta njohë Kosovën

Kryeministri i sapozgjedhur malazez nuk pranon të thotë nëse qeveria e tij do
ta njohë Kosovën
================================================================================
Korresp. 24-ore.com on 01 March, 2008 05:18:00
 
Deputetët e Malit të Zi miratuan kandidaturën e Milo Gjukanoviçit në postin
e kryeministrit të ri të vendit, si edhe programin e qeverisë së tij.
Zoti Gjukanoviç kishte dhënë dorëheqjen nga posti i kryeministrit në vitin
2006, pasi kishte udhëhequr vendin e tij deri në pavarësinë e vendit, por iu
rikthye postit pasi Zeljko Sturanoviç dha dorëheqjen për arsye mjekësore. Ai
vuan nga një formë e rrallë e kancerit në mushkëri.
Në fjalën e tij para parlamentit, zoti Gjukanoviç u zotua të vazhdojë
politikat e paraardhësit të tij dhe të ecë përpara me konsolidimin e
lidhjeve me Bashkimin Evropian. Megjithatë ai nuk pranoi t’u përgjigjej
pyetjeve të deputetëve i pyetur nëse qeveria e tij do ta njohë pavarësinë
e Kosovës.
Zoti Gjukanoviç ka shërbyer në disa mandate si kryeministër derisa u zgjodh
president i Malit të Zi në vitin 1998. Ai u bë përsëri kryeministër në
vitin 2003 dhe qëndroi në atë post për tre vjet.