24 ore lajme: Mblidhen liderët e së majtës: Bojkot deri në zbardhjen e zgjedhjeve

Mblidhen liderët e së majtës: Bojkot deri në zbardhjen e zgjedhjeve
================================================================================
Korresp. 24-ore.com on 24 September, 2009 03:15:00
 
Janë takuar sot pasdite kryetarët e partive të majta në vend, për të
diskutuar mbi rrugën që do të ndjekë opozita, pas tentativave të vakëta
të mazhorancës për ti ftuar në Parlament. Mësohet se krerët e së majtës
kanë ndarë të njëjtin qëndrim për vazhdimin e mospjesëmarrjes në Kuvend.
Ky është takimi i parë i krerëve të opozitës që pas zgjedhjeve të 28
qershorit.
Në takimin e zhvilluar në selinë e PS-së, ishin të pranishëm kreu i PS,
Edi Rama, ai i PDS Paskal Milo, kryetari i G99 Erjon Veliaj, kreu i PSD Skënder
Gjinushi dhe Vangjel Dule i PBDNj-së. Sipas Paskal Milos, krerët e opozitës
kanë rikonfirmuar bindjen për të mos u bërë pjesë e Parlamentit deri në
plotësimin e kushteve, që kanë të bëjnë me atë që ata e quajnë
"zbardhje të krimit elektoral të 28 qershorit". Milo shtoi se po punohet për
të fuqizuar të majtën.
"U përcaktua shumë qartë se opozita kërkon edhe njëherë hapjen e kutive
të votimit, sepse aty fshihet e vërteta e manipulimit të zgjedhjeve. Tashmë
është më tepër se kurrë e domosdoshme që opozita të unifikohet dhe të
bashkërendohet. Do të ketë takime të tjera në të cilat do të diskutohet
për kalimin në një fazë tjetër të veprimit opozitar ", theksoi Milo.