Dosja e Prokurorise per Mediun me 800 faqe

Fatmir Mediu, ish Ministwer i Mbrojtjes

 Kryeprokurorja Ina Rama nuk ka vonuar t’i vërë në dispozicion Komisionit të Mandateve në Kuvend, gjithçka që kishin kërkuar në lidhje me kërkesën për heqjen e imunitetit të ish-ministrit të Mbrojtjes, Fatmir Mediu. “U kemi dërguar gjithçka që ata kishin renditur në kërkesën e tyre të dorëzuar një javë më parë”, - është shprehur për gazetën zëdhënësja e Prokurorisë së Përgjithshme, Olta Zhiti. Bëhet e ditur se dosja që i është dërguar Komisionit të Mandateve ishte voluminoze me rreth 800 faqe, pasi ligji nuk parashikon ruajtjen e sekretit hetimor ndaj Kuvendit. Ndërkohë, gazeta ka mundur të mësojë disa prej provave dhe dokumenteve, në bazë të të cilave, grupi i hetimit për tragjedinë e Gërdecit ka vendosur të kërkojë heqjen e imunitetit ndaj Fatmir Mediut, pasi ky i fundit duhet të hetohet për veprën penale të “shpërdorimit të detyrës”. Në dosje janë përmbledhur edhe deklarata e shefit të Shtabit të Përgjithshëm Luan Hoxha, si dhe të ushtarakëve të tjerë të lartë, Shpëtim Spahiut, Shkëlzen Madanit, Zija Brahjas etj.

Provat
Në krye të fashikullit që i është dërguar Kuvendit, kryeprokurorja Ina Rama ka renditur projektvendimin e Ministrisë së Mbrojtjes, datë 12.02.2007, dërguar për miratim qeverisë, ku specifikonte drejtpërdrejtë firmën amerikane SAC për demontimin e municioneve. Ky projektvendim, sipas burimeve pranë organit të akuzës, ka shënuar një ndër veprimet e para të Mediut, jo vetëm në favorizimin e firmës SAC, por edhe në marrjen e urdhrave të tjerë në kundërshtim me ligjin dhe rregulloret e Ministrisë së Mbrojtjes. Më pas në morinë e dokumenteve, organi i akuzës ka renditur memo-n e projekt-urdhrit nr.550 të firmosur më pas nga Fatmir Mediu, i cili ka legjitimuar aktivitetin e demontimit të municioneve në Gërdec, urdhër i cili ka anashkaluar dhe nënvleftësuar struktura të Ministrisë së Mbrojtjes dhe mjaft rregulla të këtij dikasteri për aktivitetin e magazinimit dhe demontimit të municioneve. Më pas, në dosje janë renditur një mori rregulloresh; për ruajtjen e jetës në Forcat e Armatosura, për përpilimin dhe lëshimin e dokumentacionit për veprimtarinë e import-eksportit të materialeve ushtarake, licencimin e depove të municionit etj. Përmbajtja e këtyre rregulloreve bie ndesh me pikat e urdhrit nr.550, të firmosur nga Mediu. Gjithashtu, në dosje është futur edhe memo-ja e Shtabit të Përgjithshëm, që refuzonte repartin e Bërzhitës për demontimin e municioneve. Urdhrat e Mediut që përcaktonin mënyrën dhe subjektin që bënte transportin e municioneve drejt Gërdecit, janë renditur gjithashtu në dosjen e dërguar Kuvendit. Për sa i përket shmangies së reparteve ushtarake që janë të specializuara për demontim, kryeprokurorja Ina Rama ka futur në dosje edhe kontratën e “Alba-Demil” me uzinën e Gramshit, për demontimin e municioneve të kalibrit të madh.

Burime zyrtare pranë Kuvendit bënë të ditur për GSH, se për shkak se dosja në fjalë përmban shumë sekrete hetimor lidhur me tragjedinë e Gërdecit, publikimi i saj do të ndikonte negativisht në procesin hetimor të hapur për këtë çështje. Është edhe kjo arsyeja që sipas administratës së Kuvendit, kushdo që do e bënte atë publike do të ndiqej penalisht. “Prokuroria e ka shoqëruar me një shkresë të veçantë raportin me dokumentet shtesë të kërkuar nga Komisioni i Mandateve dhe Imunitetit. Me anë të kësaj shkrese, Prokuroria e ndalon administratën e Kuvendit t’ia servirë atë medias, pasi kjo do të përbënte një nxjerrje të sekretit hetimor. Në rast të kundër, organi i akuzës paralajmëron se kushdo që e bën atë publike do të ndiqet penalisht”, - sqaruan për GSH burime zyrtare pranë administratës së Kuvendit.