24 ore lajme: Prokuroria i ka gati dokumentat shtese per imunitetin e Mediut

Prokuroria i ka gati dokumentat shtese per imunitetin e Mediut
================================================================================
Korresp. 24-ore.com on 10 May, 2008 01:50:00
 
Burime nga prokuroria kanë bërë të ditur se janë duke përgatitur
dokumentacionin shtesë të kërkuar nga Kuvendi lidhur me heqjen e imunitetit
të deputetit Fatmir Mediu. Mësohet se dokumentet do të dërgohen në Kuvend
pas disa ditësh, dokumente të cilat do ti bashkëngjiten kërkesës së
bërë para disa ditësh për heqjen e imunitetit nga Kuvendi.
Këshilli për Rregulloren, Mandatin dhe Imunitetin është mbledhur në datën
28 prill për të diskutuar çështjen për heqjen e imunitetit të Mediut,
sipas kërkesës së prokurorisë, por mbledhja nuk ka zgjatur as 10 minuta,
për mungesë dokumentacioni.
Arjan Madhi, anëtar i këshillit të PR-së ka kërkuar që kërkesa e
prokurorisë të shoqërohej dhe me dokumentet përkatëse ashtu siç e kërkon
ligji.
“Ligji e shpreh në mënyrë eksplicite, së përveç këreksës duhen edhe
dokumente shoqëruese. Ne po e mbajmë kërkesën por procedurat nuk do të
fillojnë derisa prokuroria të sjelli materialin e kërkuar”- tha Madhi.
Akuzat mbi Mediun
Mbi Mediun rëndojnë disa akuza. Kështu sipas Organit të Akuzës ai ka
shmangur forcat e armatosura nga garantimi i sigurisë dhe nga mbikëqyrja e
punës në Gërdec në kundërshtim me vendimet e Këshillit të Ministrave.
Është bërë përzgjedhje e gabuar për vendin e demontimit që ka ardhur në
kundërshtim me rregulloret e Ministrisë së Mbrojtjes, të cilat kërkojnë
licencim për vendndodhjen e depove ku kryhet demontimi.
Është lejuar demontimi i kalibrit të madh të municioneve ndërkohë që
ligji lejon vetëm demontimin e municioneve të vogla.
Është lejuar leja e eksportit për dy kompanitë, SAC dhe Albademil,
ndërkohë që rregullorja thotë se kompani të palicencuara nuk mund ta
bënin këtë gjë.
Së fundi Mediu sipas kryeprokurores nuk ka iniciuar nxjerrjen e akteve ligjore
për eksport importin e mallrave ushtarake.