Kryeministri Thaçi takon ideatorët e obeliskut “NEWBORN”

Kryeministri i Republikës së Kosovës, Hashim Thaçi, ka pritur  grupin e te rinjve, të cilët janë ideatorë të obeliskut të pavarësisë “NEWBORN”, të prirë nga z. Fisnik Ismaili.

Kryeministri Thaçi ka thënë se kishte kënaqësinë që t’i takonte të gjithë këto vasha dhe këta djem, që na bënë të ndjehemi krenarë në ditën e shpalljes së pavarësisë, në shtetin tonë të ri, me fillimin e ri, me lindjen e re, me perspektiven dhe përgjegjësinë e re. “Ideja e tyre ka shpërthyer të gjitha mediumet botërore dhe ka bërë që të gjithë të shikojnë se Kosova është shpallur e pavarur, se është lindje e re dhe është një shtet i ri me perspektivë të sigurt në duart e njerëzve të rinj”, është shprehur kryeministri Thaçi.

Ndërsa, kreatori i obeliskut të pavarësisë, z. Fisnik Ismaili, ka falënderuar kryeministrin dhe Qeverinë e Kosovës për ndihmën që i kanë dhënë për të jetësuar projektin e tij, i cili tash ka mbetur edhe si shenjë që e kujton ditën e shpalljes së pavarësisë.