24 ore lajme: Rreth 80 serbë edhe sot po qëndrojnë në oborrin e gjykatave në veri të Mitrovicës

Rreth 80 serbë edhe sot po qëndrojnë në oborrin e gjykatave në veri të
Mitrovicës
================================================================================
Korresp. 24-ore.com on 15 March, 2008 12:45:00
 
Zëdhënësi i policisë rajonale në Mitrovicë, Besim Hoti, tha sot se rreth
orës 7:00 të mëngjesit në oborrin e ndërtesës së gjykatave në veri të
Mitrovicës janë duke qëndruar rreth 80 serbë, ndërsa përreth objektit
ndodhen forca të njësisë speciale të policisë së UNMIK-ut.
Të përkujtojmë se Sekretari i Përgjithshëm i NATO-s, Jaap de Hoop Scheffer
zhvillimet e djeshme në veri të Mitrovicës, respektivisht hyrjen e dhunshme
të një grupi serbësh në Gjykatën e Mitrovicës, e cilësoi si sulm kundër
UNMIK-ut dhe kundër bashkësisë ndërkombëtare.
Ai theksoi se tash për tash situata po mbahet nën kontroll të policisë, por
ai siguroi se KFOR-i do të intervenojë në qoftë se do të jetë e nevojshme.
Sekretari Scheffer gjatë kësaj vizite së në Kosovë ritheksoi përkushtimin
e trupave të NATO-s për të garantuar paqe dhe stabilitet në Republikën e
Kosovës.
“Kosova nuk mund të fitojë asgjë me anë të provokimeve dhe mendoj se
kryeministri e presidenti kanë treguar moderim, siç kanë treguar dhe po
tregojnë shumë njerëz në Kosovë”, tha Scheffer, pas bisedave me
presidentin Fatmir Sejdiu dhe kryeministrin Hashim Thaçi.