24 ore lajme: Aksident me pasoje vdekje ne Vushtri

Aksident me pasoje vdekje ne Vushtri
================================================================================
Korresp. 24-ore.com on 02 March, 2008 04:28:00
 
Rreth orës 17:15min, autoritetet policore të stacionit Vushtrri, së bashku me
njësitë e trafikut rajonal të Mitrovicës, i janë përgjigjur një aksidenti
të rëndë në trafik, që ka rezultuar me fatalitet.  Aksidenti është
raportuar të ketë ndodhur në rrugën magjistrale Mitrovicë-Prishtinë,
përkatësisht në fshatin Pestovë, ku kanë qenë të përfshira një veturë
civile e tipit “Fiat Bravo” dhe një këmbësore 17 vjeçare, banore e
Vushtrrisë.
Aksidenti është shkaktuar në kohën kur automjeti po qarkullonte nga
drejtimi i Mitrovicës në drejtim të Prishtinës, godet viktimën e cila në
atë moment në grup me katër persona të tjerë po kalonin rrugën nga ana e
majtë në të djathtë të magjistrales.
Viktima është transportuar urgjentisht në QKUK Prishtinë.  Në bazë të
raportit të mjekut kujdestar i cili ka konfirmuar vdekjen e viktimës,
mësohet se viktima është sjellë në QKUK, pa shenja jete.
Prokurori publik i prokurorisë së qarkut në Mitrovicë, është njoftuar dhe
ka dalë në vend të ngjarjes.
Drejtuesi i automjetit, një 27 vjeçar, është arrestuar nga policia dhe ndaj
tij është caktuar ndalimi policor për hetime të mëtejme lidhur me rastin.
Hetuesit policor të trafikut rajonal të SHPK-së, janë duke zhvilluar
hetimet për të përcaktuar shkaktarin e këtij aksidenti.