24 ore lajme: Carl Bildt: Kosova do të jetë pjesë e proceseve integruese Evropiane

Carl Bildt: Kosova do të jetë pjesë e proceseve integruese Evropiane
================================================================================
Korresp. 24-ore.com on 08 March, 2008 08:35:00
 
Presidenti i Republikës së Kosovës, dr. Fatmir Sejdiu  takoi sot , z. Carl
Bildt, ministër i Punëve të Jashtme i Suedisë
Presidenti Sejdiu e falënderoi z. Bildt për vendimin e Mbretërisë së
Suedisë për njohjen e pavarësisë së Kosovës, si dhe për ndihmën e
përgjithshme të Suedisë dhënë Kosovës, duke përfshirë edhe prezencën e
saj në Kosovë.
Presidenti i Republikës së Kosovës, z. Fatmir Sejdiu prezantoi qëndrimin e
Kosovës për të vazhduar në qasjen e saj themelore, që të jetë një vend
demokratik i të gjithë qytetarëve, një vend që do të ketë kujdesinë e
veçantë ndaj komuniteteve pakicë, dhe që do të realizojë projektin e
rëndësishëm të Presidentit Ahtisaari, si  dhe orientimin e Kosovës për
të qenë e integruar në mekanizmat euro-atlantike.
Ndërkaq, z. Bild, i cili solli dokumentin  zyrtarë të njohjes
ndërkombëtare të pavarësisë së Kosovës nga vendi i tij,  pas takimit me
Presidentin Sejdiu tha se u bisedua për ndryshimet që kanë ndodhë në
Kosovë dhe për sfidat e vërteta për Kosovën, jo vetëm për tu bërë një
shoqëri funksionale multietnike dhe demokratike, por edhe në çështjet
ekonomike dhe sociale.
Duke premtuar mbështetjen e vendit të tij për Kosovën ai theksoi: ”Dy tri
vitet e ardhshme mund të jenë kritike për Kosovën, para se të ndodhin
ndryshimet e vërteta në sferën e ekonomike. Ne do t’ju ndihmojmë aq sa
mundemi por, puna duhet të bëhet nga autoritetet e Kosovës”.
Ministri i Punëve të Jashtme i Suedisë shprehu kënaqësinë që vendi i tij
është këtu për të ndihmuar dhe  pohoi se Kosova do të jetë pjesë e
proceseve integruese evropiane e cila është esenciale për një të ardhme
paqësore dhe prosperuese për rajonin dhe Kosovën.