24 ore lajme: Liderët e Republikës së Kosovës përkulen para varrezave të dëshmorve në Prekaz

Liderët e Republikës së Kosovës përkulen para varrezave të dëshmorve në
Prekaz
================================================================================
Korresp. 24-ore.com on 06 March, 2008 06:58:00
 
Në Ditën e Dëshmorëve të UÇK-së, zyrtarë të lartë të Republikës së
Kosovës, presidenti Fatmir Sjediu, kryeministri Hashim Thaçi,
kryeparlamentari Jakup Krasniqi, liderë të partive politike, pjesëtarë të
TMK-së, veteranë të UÇK-së dhe një numër i madh i qytetarëve nga të
gjitha trojet shqiptare kanë bërë homazhe pranë varrit të Komandantit
Legjendar të UÇK-së, Adem Jashari dhe dëshmorëve tjerë të familjes
Jashari në Prekaz.
Presidenti i Republikës së Kosovës, Fatmir Sejdiu ia dorëzoi familjes
Jashari, dekoratën "Urdhri Hero i Kosovës", me të cilën më 26 nëntor
2004, Presidenti historik i Kosovës, dr. Ibrahim Rugova e pati dekoruar
komandantin e UÇK së, Adem Jasharin.
Më këtë rast Presidenti Sejdiu tha se familja Jashari është një
simbolikë e veçantë e përkushtimit dhe sakrificës për pavarësinë e
Kosovës.
Kryeministri Hashim Thaçi ka vlerësuar se institucionet e Kosovës e kanë
jetësuar amanetin e Komandantit Legjendar Adem Jashari, sakrificën dhe
vullnetin e tij, dhe shtoi se nuk ka gjë më të mirë se sa sot t'i shohësh
bashkë të gjithë në Prekaz, duke respektuar dhe nderuar luftën.
Homazhe u bënë edhe në varrezat e dëshmorëve në vendet e tjera, kurse në
Gllogjan bëri homazhe edhe delegacioni i Shtabit të Përgjithshëm të Trupave
të Mbrojtjes së Kosovës i prirë nga gjenerallejtënant Sylejman Selimi.
Sot në mbrëmje mbahet Akademi solemne në sallën “1 tetori” në
Prishtinë.