Kthehen në punë njëmbëdhjetë oficerë korrektues që i përkasin komunitetit serb

 Pas përpjekjeve të vazhdueshme të Ministrisë së Drejtësisë, për t’i bindur oficerët korrektues që vijnë nga komuniteti serb, që të kthehen në vendet e tyre të punës, njëmbëdhjetë prej tyre janë kthyer sot në punë, të cilët i ka inkurajuar ministrja Kelmendi, që ta vazhdojnë punën dhe i ka falënderuar për gatishmërinë e tyre për të qenë pjesë e institucioneve të Republikës së Kosovës. 
Ministrja e Drejtësisë Nekibe Kelmendi, sërish ofroi bashkëpunimin dhe mbështetjen e saj dhe të gjithë Ministrisë së Drejtësisë, oficerëve korrektues të minoritetit serb.
Nga tetëdhjetedy sa ishte gjithsej numri i oficerëve korrektues, të suspenduar, 5 prej tyre janë kthyer në punë në Qendrën Korrektuese për Femra dhe të Mitur në Lipjan, 5 në Qendrën e Paraburgimit në Lipjan dhe 1 në Qendrën e Paraburgimit në Gjilan.
Ndërkaq, punën në Shërbimin Korrektues të Kosovës e kanë vazhduar normalisht 55 pjesëtarë të komunitetit serb, 5 prej tyre në Qendrën Korrektuese për Femra dhe të Mitur në Lipjan, 5 në Qendrën e Paraburgimit në Lipjan dhe 45 në Qendrën e Paraburgimit në Mitrovicë. Gjithashtu, në Shërbimin Korrektues të Kosovës punojnë edhe 17 pjesëtarë të komunitetit boshnjak dhe një slloven.
Afati i masës - suspendim nga puna - përfundon nesër, më 15 maj 2008, prandaj Ministrja Kelmendi sërish i bën thirrje të gjithë stafit të Shërbimit Korrektues të Kosovës, të cilët vijnë nga komuniteti serb, që të mos bien nën ndikimin e politikës së Serbisë, e cila shkon në dëm të tyre, por të paraqiten në vendet e tyre të punës në Institucionet Shtetërore të Republikës së Kosovës, në të kundërtën do të merren masat në përputhje me ligjin, njofton Zyra për informim pranë Ministrisë së Drejtësisë.
 

Shtoni ne: del.icio.us | AskJeeves Google Yahoo Windows Live Technorati Newsvine Digg