Thaci: ka indikacione te bazuara se defektet e paraqitura në KEK janë sabotime

 Kryeministri Hashit Thaçi tha sot se ka indikacione të bazuara që avaria e ditëve të fundit në KEK- është sabotazh, duke porositur sabotuesit se do të përgjigjen para drejtësisë.Kryeministri i bëri këto komente pas një takimi me përfaqësuesit e agjencive të udhëtimeve, nga të cilët mori zotimin se nuk do të ketë ngritje çmimesh për diasporën që dëshiron të vijë në Kosovë për festën e pavarësisë.  
Me tone të ashpra kryeministri Thaçi ka folur për avarinë në Bllokun B2 të Termocentralit Kosova B të cilën ai e ka quajtur sabotazh në prag të ditë së shpalljes së pavarësisë.
“Kemi indikacione të bazuara se defektet e paraqitura në KEK nuk janë defekte por është sabotazh. Prandaj, të gjithë ata që bëjën sabotazhe të tilla, në ditët e pavarësisë së Kosovës, në vend se ta qesim Kosovën në dritë për çka kemi sakrifikuar e punuar, si popull dhe institucione, do të përballen me drejtësinë”, tha kryeministri.
Kryeministri nuk u përgjigj se kush janë sabotuesit ndërkohë që shtoi se gjithë angazhimi i tij sot ka qenë shqyrtimi i mundësive që pavarësinë ta festojmë në dritë e jo në terr.
Këto komente kryeministri i bëri gjatë pas një takimi me përfaqësuesit e agjencive të udhëtimit, më të cilët ka biseduar për lehtësiumin e udhëtimit bashkëatdhetarëve nga diaspora që dëshirojnë të vijën për të festuar pavarësinë.
“Në asnjë rrethanë të mos ketë ngritje të çmimeve të biletave por thjeshtë të ketë një përkujdesje dhe një lehtësim për udhëtimin e tyre dhe kam marrë zotimin, mund të them se kemi edhe një marrëveshje mirëkuptimi në këtë drejtim që do të keni përkrahjen e plotë nga Qeveria”, tha kryeministri.
Edhe Remzi Ejupi, i cili foli në emër të përfaqësuesve të Agjencive të udhëtimit, tha se nuk do të ketë ngritje çmimesh dhe se do të ketë kapacitete të mjaftueshme për të gjithë ata që dëshirojnë të udhëtojnë.
 
 

Shtoni ne: del.icio.us | AskJeeves Google Yahoo Windows Live Technorati Newsvine Digg