24 ore lajme: Shpigel": Njohja e Kosovës shkaktoi kontest në "koalicionin e gjërë"

Shpigel": Njohja e Kosovës shkaktoi kontest në "koalicionin e gjërë"
================================================================================
Korresp. 24-ore.com on 25 February, 2008 08:19:00
 
Vendimi i Qeverisë federale në Berlin për ta njohur pavarësinë e Kosovës
shkaktoi "pakënaqësi dhe kontest të rëndë" në koalicionin e gjërë të
kancelares Angela Merkel, shkruan sot javorja politike gjermane "Shpigel".
"Në çështjen kosovare ekzistonin vetëm dy vendime të këqija..., ndërsa
njohja e Kosovës është njëra nga ato", deklaroi, siç transmeton "Shpigel",
eksperti për politikë të jashtme i Partisë Socialdemokrate (SPD) Nils Anen.
Eksperti për Ballkanin, gjithashtu nga radhët e SPD-së, Johanes Jung, sipas
"Shpigel", ka shprehur dyshim se Kosova do të mund të bëhet shtet, i aftë
për jetë.
"Shpigel" shkruan se të mërkurën e kaluar në takim të Komisionit
parëamentar për politikë të jashtme janë shfaqur shumë dyshime të
socialdemokratëve, kur bëhet fjalë për Kosovën.
Zëdhënësi i SPD-së për çështje të politikës së jashtme, Gert
Vajskirhen, sipas javores gjermane, e ka shënuar Kosovën si "shtet mafioz",
por siç theksohet, pas protestës së deputetëve të tjerë, është
tërhequr.
Në të njëjtën kohë Vajskirhen e ka sulmuar bllokun demokristian të
kancelares Merkel për shkak të raportit ndaj Partisë Demokratike të
Serbisë, duke kërkuar prej tyre "haptazi dhe qartë" ta kritikojnë Vojisllav
Koshtunicën, i cili, sipas vlerësimeve të këtij politikani gjerman, bart
përgjegjësi për trazirat në Beograd dhe për sulmin ndaj ambasadës
gjermane.