24 ore lajme: Bjellorusia i kërkon ambasadorit amerikan të largohet nga vendi

Bjellorusia i kërkon ambasadorit amerikan të largohet nga vendi
================================================================================
Korresp. 24-ore.com on 08 March, 2008 03:50:00
 
Bjellorusia i ka kërkuar ambasadorit amerikan të largohet nga vendi dhe ka
thirrur ambasadorin e saj nga Shtetet e Bashkuara. Ministria e Jashtme e
Bjellorusisë tha sot se këto vendime u morrën për shkak të vendimit të
Shteteve të Bashkuara për t’i vënë sanksione vitin e kaluar firmës
shtetërore bjelloruse të rafinimit të naftës Belneftekhim.
Shtëpia e Bardhë e kundërshtoi veprimin e Bjellorusisë, duke thënë se
“kishte mbetur thellësisht e zhgënjyer dhe ky është një hap që largon
edhe më tej vendin nga Evropa dhe bota”. Një zëdhënës i Shtëpisë së
Bardhë tha se është për të ardhur keq që Bjellorusia vazhdon masat
shtypëse kundër qytetarëve të saj.
Shtetet e Bashkuara dhe Bashkimi Evropian e kanë kritikuar vazhdimisht
Presidentin Aleksandër Lukashenko për shkeljen e të drejtave të njeriut,
për shtypjen e opozitës dhe për goditjen e medias së pavarur në
Bjellorusi. Kundërshtarët e tij e akuzojnë zotin Lukashenko për manipulimin
e zgjedhjeve të 2006 që i dhanë atij një mandat të tretë në detyrë.