Presidenti Obama bën thirrje për një fillim të ri në marrëdhëniet mes SHBA dhe botës myslimane

Presidenti amerikan Barak Obama bëri thirrje për një fillim të ri në marrëdhëniet mes Shteteve të Bashkuara dhe një miliardë myslimanëve të botës, duke thënë se duhet të marrë fund cikli “i dyshimeve dhe përplasjeve”.

Gjatë një fjalimi që mbajti sot në Universitetin e Kajros, presidenti Obama tha se ekstremistët e dhunshëm kanë shfrytëzuar tensionet midis myslimanëve dhe Perëndimit. Ai tha se Shtetet e Bashkuara dhe bota myslimanve duhet të punojë së bashku për të konfrontuar ekstremizmin në të gjitha format.

Zoti Obama vuri në dukje planet e tij për të tërhequr trupat amerikane nga Iraku dhe për t’ia lënë Irakun irakianëve. Ai tha se Shtetet e Bashkuara duan që trupat amerikane në Afganistan të kthehen në atdhe, por përsëriti angazhimin e tij për të vazhduar luftën kundër ekstremistëve në atë vend, të cilët janë të vendosur të vrasin amerikanë dhe shtetas të tjerë.

Ai e cilësoi konfliktin izraelito-palestinez si një burim kryesor tensionesh, madje përsëriti nevojën e një shteti të veçantë palestinez, që do të ekzistonte krah për krah Izraelit.

Presidenti Obama tha se palestinezët duhet të braktisin dhunën dhe izraelitët duhet të njohin të drejtat e palestinezëve për të ekzistuar.

Zoti Obama tha gjithashtu se Shtetet e Bashkuara janë gati të avancojnë për sa i përket çështjes së Iranit dhe të kapërcejnë dekada të tëra mosbesimi.