24 ore lajme: Presidenti Topi pret aktorin italian Mikele Placido

Presidenti Topi pret aktorin italian Mikele Placido
================================================================================
Korresp. 24-ore.com on 13 March, 2008 04:49:00
 
Presidenti i Republikës, Bamir Topi ka pritur sot në mesditë në një takim
të përzemërt e miqësor aktorin e mirënjohur italian Mikele Plaçido.
Presidenti Topi, pasi i uroi mirëseradhjen, e falenderoi aktorin italian për
kontributin e tij dhënë në interpretimin e filmave me temë nga jeta e
shqiptarëve, vlerësoi interpretimet e tij të rëndësishme në mjaft role,
të cilat pasqyrojnë shqetësimet dhe problemet më kyçe që shqetësojnë
sot vendet e zhvilluara evropiane.
Nga ana e tij, aktori italian, Mikele Plaçido falenderoi Presidentin Topi për
mikpritjen e tij, theksoi se është i mahnitur nga ndryshimet pozitive të
Shqipërisë dhe u shpreh entuziast për të ardhmen e saj edhe në planin
njerëzor. Z. Plaçido u shpreh se filma të tillë luajnë një rol të
rëndësishëm në ngritjen e urave kulturore dhe forcimit të lidhjeve mes
popujve dhe kulturave duke i shërbyer më miri edhe edukimit të brezit të
ri.
Aktori italian gjendet në vendin tonë për promovimin e filmit “Trishtimi i
zonjës Shnajder”, në të cilin është dhe një ndër protagonistët
kryesorë.
Në takim ishin të pranishëm edhe Ambasadori i Italisë në Shqipëri, Saba
D’Elia dhe regjisori i filmit “Trishtimi i zonjës Shnajder” Pirro
Milkani.