24 ore lajme: Shqiperi: Qeveria nuk konfirmon rënie të avionit

Shqiperi: Qeveria nuk konfirmon rënie të avionit
================================================================================
Korresp. 24-ore.com on 04 March, 2008 06:05:00
 
Autoritetet në Shqipëri nuk e konfirmojnë lajmin e rrëzimit të një mjeti
fluturues brenda territorit shqiptar.
Më herët, gjatë ditës ishte njoftuar se një avion i paidentifikuar kishte
humbur kontaktet me operatorët shqiptarë dhe italianë në orët e para të
mëngjesit, në zonën pranë kufirit shqiptar me Malin e Zi dhe Kosovën.
Deri tani kërkimet në malin e Jezercës nuk kanë dhënë asnjë rezultat.
Sipas autoriteteve në Tiranë, pas informacioneve të marra nga forcat ajrore
edhe të vendeve fqinj dhe KFOR-it, nuk rezulton asnjë mjet fluturues i
ngritur që të ketë përshkruar zonën ajrore ku dyshohet të ketë humbur
mjeti fluturues.
Por autoritetet shqiptare njoftojnë se qendra rajonale e kontrollit të
hapësirës ajrore në Romë ka raportuar një objekt fluturues në atë zonë,
në orën 04. 25 të mëngjesit të ditës së martë.
Operacioni i kërkimit nga ajri është ndërprerë për arsye të
vështirësive të mëdha, njoftohet zyrtarisht në Tiranë, ndërkohë që
vazhdon operacioni në rrugë tokësore.