24 ore lajme: Kreu i PS Rama, letër Topit: “Fale nënë Feriden”

Kreu i PS Rama, letër Topit: “Fale nënë Feriden”
================================================================================
Korresp. 24-ore.com on 29 December, 2008 06:01:00
 
Kryetari i Partosë Socialiste Edi Rama, i shkruan presidentit të Republikës
Bamir Topi ku i drejtohet me kërkesën për të falur 75 vjeçaren Feride Bako,
e moshuara e dënuar për kultivim Kanabis e burgosur në burgun e grave 325 në
Tiranë. Kërkesa zyrtare e kreut te PS-së, Rama vjen pas një kërkese publike
të artikuluar pak ditë më parë gjatë një konference për shtyp ku Rama u
shpreh se “drama e nënë Ferides është drama e atyre që vuajnë në
skajshmëritë e një mjerimi total”.
”Ju parashtroj përmes kësaj letre kërkesën time që të ushtroni të
drejten e faljes për një shtetase të moshuar në zbatim të kompetencave
tuaja të parashikuara nga Kushtetuta e vendit” -nis letra e kreut të PS
Rama, drejtuar presidentit Topi.
Më pas Rama shkruan se “gjyshja e kyçur në burg është shembëlltyrë e
pafajshme e varfërisë që e ka shtyrë atë përtej kufijve të ligjit”.
Rama kërkon lirimin e nënë Ferides si të vetmen mbështetje për dy nipërit
e saj ende fëmijë, të cilët mbijetojnë vetëm, në një kasolle pa asnjë
kusht për t'u quajtur shtëpi. Çdo ditë që kalon është një aventurë e
paparashikueshme për ata dy fëmijë“.
Rama tha se “duhet amnisti për raste të ngjashme me ato të nënë
Ferides“.
Rasti i nënë Ferides u trajtua për herë të parë në emisionin “Me Zemër
të Hapur” në televizionin “NEWS24” ku ishte vetë nënë Ferideja dhe
të afërm të saj që kërkuan ndihmë për lirimin e së moshuarës.
“NEWS24” solli në vëmendje rastin e dy fëmijëve jetimë rritja e të
cilëve u është besuar 75 vjeçares që mbahet në burg, pasi i ati i tyre nuk
jeton më dhe nëna i ka braktisur.