24 ore lajme: Fryhet Vjosa, prefektura e Fierit: 12 fshatra në rrezik

Fryhet Vjosa, prefektura e Fierit: 12 fshatra në rrezik
================================================================================
Korresp. 24-ore.com on 18 December, 2008 07:21:00
 
Fryrja e lumit të Vjosës rrezikon përmbytjen e 12 fshatrave në zonën e
Fierit, të cilët nga momenti në moment rrinë të pritje të daljes së
lumtit nga shtrati. Përballë situatës emergjente, prefekti Shahin Bejdaj i ka
bërë thirrje banorëve të jenë gati për një evakuim të mundshëm.
“Situata është kritike, por ende nuk mund të flasim për përmbytje. Vetëm
u kemi bërë thirrje banorëve që të jenë në pritje dhe në gatishmëri
për çdo situatë. Ata janë njoftuar tashmë se duhet të lënë shtëpitë
sapo të shohin që lumi nis të dalë nga shtrati”- tha prefekti për mediat,
duke e quajtur situatën kritike.
Ai ka numëruar një sërë fshatrash që janë në rrezik evakuimi, plot 12 dhe
të gjithë fshtara në zonën e Mallakastrës, Frakullës, Cakran dhe Levan,
zona pranë të cilave kalon lumi Vjosë.
Sipas prefektit, është mbledhur me urgjencë shtabi i emergjencave civile, që
po ndjek situatën, ndërkohë që ende nuk është kërkuar ndihmë për
ndërhyrje, pasi si specialistët edhe banorët janë në pritje.
Ai ka thënë se fryrja e lumit ka ardhur në mënyrë të papritur dhe ka
theksuar se do merren masat që të mos përsëritet situata e vitit 2005.
“Nëse situata do të vijojë përkeqësimin, atëherë shtaboi do të
njoftojë masat e radhës”- ka thënë më tej ai.
Ndërkohë, banorët e zonave janë më shumë se të alarmuar. Ata nëpër
ballkone dhe oborre rrinë në pritje me sytë nga lumi, apo nga të afërm që
mund tu thonë për ecurinë.
Specialistët kanë pranuar se prurjet janë të shumta, por kjo nuk lidhet me
sasinë e reshjeve që bien në Fier, por në zonën e burimit, ndaj po mbahen
në kontakt me Tepelenën e Gjirokastrën.
Ndërkohë, për shkak të reshjeve, lumi Drino ka dalë nga shtrari duke
shkaktuar përmbytje tokash në Gjirokastër. Për fat, në zonën përreth nuk
ka shumë shtëpi banimi, por hapësira me toka. Probleme ka pasur edhe në
qytetin e Çorovodës ku shumë shtëpi dhe një urë kërcënohen nga vërshimi
i ujërave të lumit që kalon përmes qytetit.